সৰ্বেশ্বৰ ছাৰ আৰু নাই!
শিক্ষাগুৰু, মোৰ হাস্যৰস-প্ৰেমৰ এক অমল উৎস, যোৱাবছৰ প্ৰকাশ হোৱা মোৰ “জীৱন বাটৰ ৰস” নামৰ কিতাপখনৰ তিনিটা মূল চৰিত্ৰৰ অন্যতম, সৰ্বেশ্বৰ ছাৰ আৰু নাই। ভাতৃপ্ৰতীম নিতুমনিয়ে (ভূঞা) খবৰটো কালি লগে লগেই দিলে – ছাৰ ঢুকাল। ছাৰৰ মৃত্যুৰ লগে লগেই যেন এটা অধ্যায়ৰ সমাপ্তি হ’ল। এনে লাগিছে ইপাৰতকৈ সিপাৰতহে যেন চিনাকি মানুহৰ সংখ্যাটো লাহে লাহে বাঢ়ি আহিছে।
ছাৰ মোৰ দৰেই বহুতৰ বাবে অকল পঢ়াশালি নামৰ প্ৰতিস্থান এটাৰ শিক্ষকেই নাছিল। কিতাপখনত মই ছাৰৰ কথা এইদৰে লিখিছিলো – “কটন কলেজৰ পৰা বিজ্ঞান শাখাত স্নাতক শিক্ষা গ্ৰহন কৰি অহাৰ পাছতে বৰকটকী ছাৰে এদিন সৰ্বশ্বৰ ছাৰক “কৰচোন ইয়াতে অলপদিন” বুলি স্কুলৰ চাকৰিলৈ মাতি আনিলে৷ ছাৰে ইচ্ছা কৰা হলে এজন প্ৰশাসনীয় বিষয়া, অধ্যাপক নতুবা এজন উকীল হৈ কৰ্মজীৱন আৰম্ভ কৰিব পাৰিলেহেঁতেন৷ কিন্তু ছাৰে তেনে নকৰিলে৷ স্কুলখনৰ উৰ্বৰ ভূমিৰ মোহত শিক্ষকতা, নাট্যচৰ্চা আদিৰে আমাৰ অঞ্চলটোক নেতৃত্ব দি সেই চাকৰিতেই এদিন ছাৰে অৱসৰ গ্ৰহন কৰিলে৷
প্ৰখৰ হাস্যৰস আৰু ক্ষীপ্ৰ-তীৰ্যক ব্যংগত ছাৰৰ সমকক্ষ কোনো নাছিল৷ সততে গহীন হৈ থাকি ছাৰে কেতিয়াবা এনেকুৱা কিছুমান বাক্য প্ৰয়োগ কৰিছিল যে শ্ৰোতাৰ পেটৰ নাৰী ডাল ডাল হৈছিল৷ সেই গুণ ছাৰলৈ স্বতঃস্ফূৰ্ত ভাবে আহিছিল৷ মোৰ দৰে অনেক ছাত্ৰয়েই ছাৰক পৰম শ্ৰদ্ধাৰে সোঁৱৰণ কৰে ছাৰে উপহাৰ দিয়া কেতবোৰ অতুলনীয় মূহুৰ্তৰ বাবে৷ কথা কোৱাৰ অপূৰ্ব কৌশল আৰু প্ৰখৰ হাস্যৰসৰ তুলনাবিহীন প্ৰয়োগত সৰ্বেশ্বৰ ছাৰৰ যেন কোনো সমকক্ষই নাছিল!”
যোৱাবছৰৰ ডিচেম্বৰ মাহত মোৰ ডাঙৰ ল’ৰা বাপুকলৈ ছাৰৰ ওচৰলৈ গৈছিলো। ছাৰৰ ল’ৰা সৌৰভো (অভিনেতা সৌৰভ হাজৰিকা) সেইদিনা ঘৰতে আছিল। ছাৰৰ সমসাময়িক কোন কোন এতিয়াও জীয়াই আছে তাৰ হিচাপ দি আৰু তেখতসকল কি কি খোৱা কাৰণে নতুবা সেৱন কৰা কাৰণে জীয়াই আছে সেইয়া ছাৰে ৰগৰ কৰি ইম্মান ৰস লগাই কৈছিল যে এতিয়াও মনত পৰিলে হাঁহি উঠে। মুখে মুখে চলি অহা ছাৰৰ কেইটামান কাহিনীহে মই লিখিব পাৰিলো, নিলিখা বহু কথা এতিয়াও আমাৰ অঞ্চলটোত চলিয়েই আছে।
এক সাৰ্থক জীৱনৰ উদাহৰণ দেখুৱাই ছাৰে জীৱনটো অতিবাহিত কৰিলে। মহাজীৱনৰ সিপাৰে আকৌ ছাৰক লগ পোৱাৰ আশা ৰাখিছো। ছাৰৰ মৃত্যুত মই মোক কম কথাৰে, কিন্তু মৰমৰ ৰস আৰু আশীৰ্বাদেৰে চিৰদিন অনুপ্ৰানিত কৰি ৰাখিব পৰা এজন গুৰুসদৃশ ব্যক্তিক হেৰুৱালোঁ। ছাৰলৈ অশ্ৰুসিক্ত শ্ৰদ্ধাঞ্জলি আৰু সৌৰভ সমন্বিতে পৰিয়ালৰ আটাইলৈ গভীৰ সমবেদনা জ্ঞাপন কৰিলো।
No comments:
Post a Comment